Avokati i Ervin Salianjit, Ledio Braho ka dhënë një deklaratë të shkurtër për mediat, disa orë pasi deputeti demokrat u vetëdorëzua në policinë e Tiranës.
Braho u shpreh se Salianji do të transferohet në burgun e Fierit mbrëmjen e sotme , ku pritet të vuajë dënimin me një vit burg, vendim i marrë nga Gjykata e Apelit për veprën penale kallëzim i rremë.
“Pamë një sjellje krejtësisht korrekte nga oficeërt e policisë. Salianji u nis drejt burgut që i ka caktuar regjimi, që është burgu i Fierit, që mbrëmjen e sotme do iki direkt në burgun e Fierit”, theksoi Braho.
I pyetur nga gazetarët nëse do të jetë problem fakti që Salianji do të jetë në të njëjtin burg ku janë edhe ish-funksionarë apo ish-eksponentë të PS që janë dënuar, avokati u shpreh se:
“Nuk ka asnjë problematikë të tillë, të paktën nga informacionet që ne kemi. Gjithsesi kjo është detyrë e shtetit, nuk është detyrë e z.Salianji që të shmangë përplasjet”.
Ervin Salianji u vetëdorëzua pasditen e sotme rreth orës 17:30 në Policinë e Tiranës, një ditë pasi Gjykata e Apelit e dënoi me 1 vit burg për kallëzim të rremë për çështjen “Babalja”.
