Tomor Zeqo i dënuar me 35 vite burg ka tentuar të vrasë veten në burgun e Zaharisë në Fushë-Krujë.
47-vjeçari në vitin 2014 dhunoi dhe detyroi bashkëshorten e tij Mimoza Zeqo që të pinte fototoksinë.
Burime nga Policia bëjnë me dije se Tomor Zeqo ka përdorur rripin e pantallonave për të tentuar vetvrasjen, por është gjetur nga rojat e burgut dhe më pas është dërguar në spital.
Burimet sqarojnë se rojet e kanë gjetur të lidhur me rripin e mesit në qafë. 47-vjeçari ndodhet në spital jashtë rrezikut për jetën.
Tomor Zeqo në 5 gusht të 2014-së torturoi për 4 orë bashkëshorten e tij. Ai e lidhi nga këmbët e duart dhe e ka qëlluar me thikë Mimoza Zeqo. Për disa orë ai dhunoi gruan në shtëpinë e tyre.
Për ta çuar krimin deri në fund 47-vjeçari e detyroi gruan që të pinte fototoksinë. Pavarisht se më pas e dërgoi në spital bashkëshorten, ajo gjeti vdekjen vetëm disa orë më vonë.
Konflikti në familje erdhi pasi Tomor Zeqo pati debat me gruan për një tradhti që ajo kishte bërë në kohën që ai ka qenë në burg. Çifti kishte patur disa konflikte me njëri-tjetrin.
Tomor dhe Mimoza Zeqo ishin të martuar prej vitesh dhe kishin dy fëmijë, të cilët kanë qenë në banesë kur ka ndodhur edhe krimi i rëndë.
