TIRANE- Pak ditë më parë Nishani i ktheu Qeverisë ligjin për mediat me argumentin se ligji parasheh që drejtori i RTSH zgjidhet me shumicë të thjeshtë. Sot një tjetër ligj i trumbetuar me forcë nga qeveria, ai i sigurisë publike nuk është dekretuar nga Presidenti.
Sipas Nishanit, ka tre arsye kryesore pse ky ligj nuk duhet të miratohet: Së pari, cenohet e drejta kushtetuese për respektimin e jetës private dhe familjare, duke vendosur kamera në sheshe të hapura apo të mbyllura publike, mjedise të punës ku ushtrohet një biznes privat, mjedise të hapura dhe të mbyllura për fëmijë.
Së dyti, ndërhyrja në të drejtën për jetë private dhe familjare përmes masave të parashikuara nuk është e justifikueshme, e domosdoshme dhe proporcionale.
Së treti, Ligji bie ndesh me direktivat e Komunitetit Europian, Konventën Europiane të të Drejtave të Njeriut dhe dispozitat e ligjit “për mbrojtjen e të dhënave personale” të miratuar në mars të vitit 2008.
Presidenti i Republikës ka kërkuar rishqyrtimin e këtij ligji, duke patur parasysh vërejtjet e përmendura prej tij.
