Kryeministri Edi Rama është ngjitur në destinacionin turistik të Thethit për të diskutuar për turizmin shoqëruar nga ministrja Elisa Spiropali dhe kryebashkiaku i Shkodrës, Benet Beci.
Kreu i qeverisë ka publikuar një video nga Buni i Bajraktarit teksa shkëmben batuta me ministren Spiropali dhe kryebashkiakun Beci, ose sic i quan ai “Mamica” dhe “Vrana Konti”.
Nga aty, kryeministri paralajmëroi një ngjitje drejt Thethit për të diskutuar me sipërmarrësit atje për një program të ri të mbështetjes për investime në këto male. Sipas Ramës, paketa e re do të kthejë në banesat e të parëve, shqiptarët që janë larguar për të fuqizuar më shumë ekonominë falë agroturizmit.
“Do të diskutojmë atje me ata të cilët kanë hapur dyert dhe e kanë kthyer Thethin në një destinacion europian turistik për programin e ri, paketën e re të mbështetjes për investimet në këto male e cila do u hapë rrugë të gjithë atyre të cilët i kanë lënë këto male në kërkim të një jete më të mirë dhe kanë punuar e punojnë pa pushim, e kanë kursyer dhe kursejnë që kursimet e tyre t’i investojnë në tokat e të parëve me një lehtësi të plotë pa pasur më ato hallet e pafundme të zinxhirit të pronave e pa pasur as nevojë të kalojnë në të gjithë atë procedurë që kërkon firmat e të gjithëve që janë të shpërndarë lart e poshtë, me një mbështetje të fuqishme qoftë në aspektin e dhënies së lejeve për të rihapur shtëpitë e të parëve, për të ndërtuar agroturizmat, për të fituar shumë më tepër seç fitojnë nga puna e lodhshme në shërbim të të tjerëve atje ku janë dhe njëkohësisht për t’i dhënë mundësi ekonomisë që të fuqizohet akoma më shumë falë turizmit e falë miliona e milionave turistëve që po mësyjnë në Shqipëri, edhe më shumë këtë vit se 10 milionët e vitit të shkuar që do të thotë, shumë më tepër të ardhura, shumë më tepër konsum, shumë më tepër punë për të gjithë zinxhirn e prodhimeve të vendit, e mbi të gjitha shumë më tepër krenari për Shqipërinë”, tha Rama.
Kryeministri paralajmëroi edhe një plan sekret e surprizë për shkodranët, të cilin tha se do ta zbulojë në një moment tjetër, por që do ta kthejë Shkodrën aty ku i takon.
