Dy vëllezër janë plagosur sot në Malin e Leshnjës, pranë kufirit grek, në Kolonjë.
Vëllezërit e qëlluar me armë zjarri janë të moshës 31 dhe 34 vjeç, të cilët janë banorë të fshatit Leshnjë.
Ata ndodheshin duke kullotur bagëtitë në vendin e quajtur “Shënkoll” në momentin e plagosjes.
Dyshohet se autori ka qenë i maskuar dhe pasi i ka qëlluar është larguar me shpejtësi.
Dy vëllezërit po marrin mjekim në Spitalin Rajonal të Ersekës, ku ndodhen jashtë rrezikut për jetën.
Nga ana tjetër Policia Kufitare dhe efektivë të Komisariatit Kolonjë po punojnë për identifikimin dhe kapjen e autorit si dhe zbardhjen e plotë të rrethanave të kësaj ngjarjeje.
