Mijëra qytetarë kanë protestuar të shtunën në Beograd kundër Qeverisë së Serbisë, në demonstratat që po vazhdojnë që nga dhjetori i vitit të kaluar, çdo fundjavë.
Protestuesit kanë brohoritur thirrje për dorëheqjen e presidentit Aleksandër Vuçiç.
Protestat antiqeveritare “Një në pesë milionë” mbahen në Beograd çdo të shtunë që më 8 dhjetor të vitit të kaluar. Ndërkohë ato janë shtrirë edhe në qytete të tjera të Serbisë.
Ato filluan si reagim për sulmin ndaj liderit opozitar, Borko Stefanoviç i cili ishte rrahur brutalisht nga sulmues të maskuar.
Vuçiç është tallur me protestuesit, duke thënë se ai nuk do të plotësojë kërkesat e tyre “edhe nëse pesë milionë njerëz protestojnë”. Që nga atëherë, protestat nuk janë ndalur nën sloganin “Një në pesë milionë”./ Opinion.al
