Një lajm interesant vjen nga Kosova, ku e përditshmja “Koha Ditore” raporton se sulmuesi Albian Ajeti ka zbuluar se e kërkon klubi anglez i Uest Hemit.
Me pushime në Kosovë, së bashku me vëllezërit Arlind e Adonis, Albiani ka lëshuar një intervistë, ku rrëfen edhe prapaskenën e ditëve të fundit.
“Për një javë rresht kam pasur bisedë me trajnerin Slaven Biliç. Më ka thënë se në afatin kalimtar të janarit dëshiron të më transferojë. Po të arrihet kjo marrëveshje më ka thënë se do të isha transferimi i vetëm i skuadrës së tij në këtë afat. Ai beson që jam lojtar i talentuar dhe se mund të kem të ardhme të ndritur në Premier Ligën e Anglisë”, ka thënë sulmuesi i talentuar i Bazelit.
“‘Kam kontratë katërvjeçare dhe po aq vjet do të jesh me mua’. Ky ka qenë premtimi i Biliçit që ma ka dhënë gjatë bisedave të shumta. Ai ka kontaktuar me mua, por ka mbetur që bisedat të vazhdojnë edhe ndërmjet klubeve”.
Albian Ajeti këtë sezon ka nisur të aktivizohet shpesh te Bazeli, ku ka shënuar edhe 4 gola mes kampionatit e kupës, përveçse po aktivizohet me Zvicrën U21, por ndërkohë ekziston ende mundësia që të bashkohet me kombëtaren shqiptare. Sportal.al
