Pak ditë pas premierës së filmit “7 ditë”, prezantuesja e “Thurje”, në Digitalb, Jonida Vokshi, flitet se ka nisur një histori të re dashurie me reperin nga Kosova, Trim Ademi, i njohur si Capital T. Ky është lajmi që javën e fundit ka pushtuar mediat online, pas publikimit fillimisht të një mesazhi ardhur në adresë të faqes “Vipat e Bllokut” në Instagram. Sipas kësaj të fundit, reperi dhe Jonida Vokshi kanë nisur një histori dashurie, madje edhe janë parë pashkë në Londër në shoqërinë e njëri-tjetrit në momente romantike. Siç raporton këtë fundjavë suplementi Panorama Plus, dyshimet për një lidhje të mundshme mes dy të rinjve janë shtuar edhe nga postimet e tyre në Instagram.
Sipas burimeve pranë çiftit, flitet se bashkë me ta ka qenë në Londër dhe këngëtarja Elvana Gjata, e cila flitet se ka prezantuar mikeshën e saj të ngushtë me reperin Capital T, me të cilin bashkëpunoi për klipin e fundit “Lejla”. Ndërkaq, edhe miqtë e afërt konfirmojnë historinë e re që ka lindur mes saj dhe këngëtarit.
Si prezantuesja, edhe reperi janë në momentet e tyre më të mira në karrierë. Pas komedisë së zezë “Kujtesa e ujit”, Jonida Vokshi ishte nusja e pafat që braktisej nga burri një javë para dasmës në filmin e ri “7 ditë”. Ndërsa Capital T është cilësuar si një ndër reperët më produktivë të këtij viti në muzikë, duke sjellë vazhdimisht projekte të reja muzikore. “100” është kënga e tij më e re, e realizuar nga producenti Mixey, tekstin e së cilës e ka shkruar vetë artisti.
Me gjithë lajmet e bëra publike ditët e fundit, as Jonida dhe as reperi nuk kanë konfirmuar asgjë për marrëdhënien e tyre, megjithatë, me siguri tani të dy do të jenë në vëzhgim.
Jonida Vokshi, më shumë se një vit më parë i ka dhënë fund lidhjes së gjatë të dashurisë me Iv Tasen, regjisori i njohur i programit E diela Shqiptare, nipi i Ardit Gjebresë. Ivi, tashmë ka krijuar një lidhje të re vetëm pak kohë pas ndarjes nga Vokshi.
