Një vajzë 17-vjeçare është vrarë me armë zjarri, ndërsa një djalë 23 vjeç ka mbetur i plagosur. Ngjarja e rëndë ka ndodhur mbrëmjen e sotme (26 dhjetor) në zonën e Laprakës në Tiranë, në rrethana ende të paqarta.
Mësohet se dy të rinjtë ishin në një lidhje dashurie, por kishin vetëm pak kohë bashkë.
Gjithashtu, bëhet me dije se gjatë momentit kur ndodhi krimi ata ishin në një mjet tip ‘Benz A Class’ ngjyrë gri, kur dy persona të maskuar i janë afruar dhe i kanë qëlluar me breshëri plumbash.
Vajza ka marrë një plumb në kokë
Burimet bëjnë të ditur se viktima është B. Gjikola, e cila ndërroi jetë në spital pasi kishte marrë një plumb në kokë. Kurse i plagosur është i riu Erjol Bengo që ndodhet në gjendje të rëndë. Ai ka marrë një plumb në shpatull.
Dy të rinjtë u qëlluan në makinë
Sipas informacioneve mësohet se dy të rinjte janë qëlluar nga persona ende të paidentifikuar, sapo ata kanë hipur në makinë.
Ndërkohë dyshohet se kanë qenë dy persona që kanë marrë pjesë në vrasja. Ata raportohet se janë larguar në këmbë.
“Më datë 26.12.2018, rreth orës 18:17, në Laprakë janë plagosur me armë zjarri në rrethana ende të paqarta shtetasit B. Gj., 17 vjeçe dhe E. B., 23 vjeç. Shtetasia B. Gj., ka ndërruar jetë në spital, ndërsa shtetasi E. B., ndodhet në gjëndje të rëndë shëndetësore”, thuhet në njoftimin e policisë.
Po punohet për zbardhjen e rrethanave, identifikimin dhe kapjen e autorit/ve. Policia ka sekuestruar kamerat e bizneseve përreth.
23 vjeçari i plagosur në gjendje kome
23 vjeçari që ka mbetur i plagosur nga atentati me armë në zonën e Laprakës është në gjendje kome.
Nga Spitali i Traumës, mësohet se i riu Eriol Bengo ka marrë një plumb në pjesën e shpatullës.
Dyshohet paraprakisht se dy persona të maskuar u ngritën pritë të plagosurit dhe vajzës 17 vjeçare që gjeti vdekje disa minuta pas krimit. Ndaj të rinjve u derdhën breshëri automatiku, ndërsa ishin brenda makinës së tyre.
