Operator i Shpërndarjes së Energjisë(OSHEE) prokuroi këtë javë kompaninë “The Headhunter”për të trajnuar rreth 5300 punonjës të saj.
Kompania private “The Headhunter” ishte e vetmja që mori pjesë në këtë tender, ndërsa nga OSHEE nuk ka pasur njoftime të mëparshme për këtë prokurim.
Kompania “The Headhunter” ofroi një çmim prej 66 milionë lekësh për realizimin e këtij trajnimi, afro 650 mijë dollarë.
Ky është një tender i majmë për këtë kompani private nëse i referohesh bilancit të saj tregtar të deklaruar për vitin 2014, ku kompania të gjithë xhiron e saj vjetore rezultonte se e kishte rreth 56 milionë lekë, afro 550 mijë dollarë.
OSHEE-ja i ka dhënë kompanisë private një tender që tejkalon xhiron e saj vjetore.
HashtagAL kontaktoi OSHEE-në dhe e pyeti në lidhje me detajet e këtij trajnimi. Pyetjes së përse këto tendera trajnuese nuk i kryen drejtoria e autorizuar shtetërore e DAP-it, zyra e OSHEE-së ju përgjigj se:
Shoqëria OSHEE sh.a. nuk është pjesë e administratës publike, por funksionon në bazë të ligjit për Shoqëritë Tregtare dhe si rrjedhoje këto trajnime nuk mund të kryhen nga Departamentin e Administratës Publike(DAP), sepse ky i fundit merret vetëm me zhvillimin e trajnimeve të asaj pjese të administratës publike në të cilin vepron dhe zbatohet ligji i Statusit të Nënpunësit Civil, pra ky i fundit nuk mbulon as personelin e administratës publike që marrëdheniet e punës rregullohen nëpërmjet Kodit të Punës.
Nga ana tjetër OSHEE-ja tha se do të trajnohen të gjitha nivelet e punonjësve të saj duke nisur që nga punonjësit e thjeshtë që bëjnë matjet nëpër shtëpi dhe biznese e duke përfunduar deri tek drejtorët dhe menaxherët e kompanisë.
OSHEE-ja nuk ofroi ndonjë të dhënë apo specifikime teknike në lidhje me pritshmëritë që kishte nga ky trajnim që përfundon në Gushtin e vitit 2016.
Vetëm pasi trajnimi të ketë përfunduar, OSHEE-ja do të bëjë vlerësimin e ndikimit të tij në rritjen profesionale të punonjësve.
Në objektivat e trajnimit OSHEE-ja renditi dhe terma të përgjithshme si “motivimin e punonjësve” “rritjen e performancës” , “komunikimi i duhur me konsumatorët”, që janë kryesisht objektiva që i synojnë organizatat jo-qeveritare(OJF) dhe duken disi të pazakonta për një korporatë si OSHEE-ja.
Por ndër objektivat e këtij trajnimi veçohen dhe kërkesa ambicioze, si për shembull “Analizimi dhe planifikimi i sistemit energjitik.”
Pra, një kompani private si “The Headhundter” e themeluar në vitin 2012, përzgjidhet për të instruktuar menaxherët e OSHEE-së se si të analizojnë dhe të planifikojnë sistemin energjitik.
Një tjetër pritshmëri nga trajnimi në fjalë është dhe “Përdorimi i drejtë i mjeteve dhe veshjeve të punës”,do të jetë sërish kompania private e angazhuar ndër të tjera dhe me biznesin e “Call Center” ajo që do të trajnojë punonjësit e OSHEE-së se si të veshin dhe si të përdorin pajimet.
Nisur nga gama e gjerë e instruksioneve që do japë kompania “The Headhunter” për 5300 punonjës së OSHEE-së, vlen të verifikohet kapaciteti i punonjësve të kësaj kompanie private që ka fituar tenderin.
Në bazë të deklarimeve zyrtare që ka bërë kjo kompani për vitin 2014, rezulton se ajo ka gjithsej 32 punonjës, nga të cilët 21 janë me pagë mujore 30 mijë lekë, pra 250 dollarë në muaj.
Vetëm 6 prej punonjësve kanë një pagë rreth 66 mijë lekë, ndërsa 5 të tjerë kanë një pagë prej 84 mijë lekësh të deklaruar.
E thënë ndryshe, trajnimin luksoz në vlerën e afro 650 mijë dollarëve për 5.300 punonjës të OSHEE-së, do e kryejë një kompani me 32 punonjës të deklaruar, 21 prej të cilëve e kanë pagën e deklaruar 30 mijë lekë, ndërsa vlera e tenderit që ka fituar kompania është më e madhe se xhiroja vjetore e saj.
Duket se OSHEE-ja, në tentativë për të rritur performancën e 5300 punonjësve të saj, fillimisht ka dyfishuar buxhetin e një kompanie private me 32 punonjës, pjesa dërrmuese e të cilëve i kanë pagat më të vogla se punonjësit e OSHEE-së.
Ndonëse nuk e dimë ende se cila do të jetë performance që do të fitojnë punonjësit e OSHEE-së pas këtij trajnimi luksoz, mund të themi me siguri se OSHEE-ja ka dhuruar një performancë të panjohur më parë në mënyrën se si bëhen prokurimet publike në këtë vend. / HashtagAL
