Policia e Shtetit ka marrë informacion se një grup kishte planifikuar të ekzekutonte ish-drejtorin e Përgjithshëm të Policisë, Gledis Nanon.
Bëhet fjalë për një ngjarje që është regjistruar rreth 3 muaj më parë. Një anëtar shumë i rrezikshëm i një organizate kriminale ka planifikuar të vrasë ish-kryepolicin Gledis Nano.
Paraprakisht dyshimet janë për shkak të hetimeve për të njëjtin grup në kohën që ishte drejtues i Antiterrorit. Nuk dihet saktësisht në çfarë kushtesh është marrë informacioni nga policia, por blutë asnjëherë nuk kanë bërë me dije për një planifikim të tillë të mundshëm për eliminimin e Nanos.
Sipas “News24”, policia nuk e ka vënë në dijeni për situatën as ish-drejtorin e përgjithshëm të Policisë së shtetit, Gledis Nanon.
Policia e Shtetit vijon hetimet lidhur me këtë informacion, të cilat po zhvillohen në mënyrë sekrete dhe ende nuk asnjë informacion zyrtar.
Mësohet se Gledis Nano jo vetëm që nuk është vënë në dijeni nga Policia, por ndaj Nanos dhe familjes së tij nuk janë shtuar as masat mbrojtëse nga policia e shtetit.
Nano u shkarkua si drejtor i përgjithshëm i Policisë së Shtetit më 31 gusht 2022 vetëm pas 10 muajsh në detyrë, me argumentin e qeverisë se nuk kishte realizuar objektivat dhe deri sot ende ndodhet jashtë policisë së shtetit.
Gledis Nano vjen nga një karrierë 19-vjeçare në Polici, ku para se të emërohej kryepolic, drejtoi për 5 vite Antiterrorin, ku u vlerësua edhe nga Ambasada amerikane për përpjekjet e përbashkëta në luftën botërore ndaj terrorizmit.
Veç trajnimeve të ndryshme ndërkombëtare nga agjenci të njohura në fushën e sigurisë, Gledis Nano në vitin 2017 u diplomua në Akademinë Kombëtare të FBI-së, në Quantico Virginia. Pak ditë më parë Nano ishte në një vizitë në SHBA.
