Pas tensioneve të ditës së djeshme të krijuara jashtë ambienteve të Kryesisë së Kuvendit, ku deputetët e përjashtuar të opozitës u penguan nga garda të hyjnë brenda dhe si rrjedhojë u futën nga dritaret, këtë të mërkurë komisionet do të mblidhen online.
Nga 10 komisionet që janë në axhendë për t’u mbledhur sot, pjesa dërrmuese do të mbahen online. Ndërkohë që deputetët e opozitës sërish kanë njoftuar se sot në orën 11:00 do të mbajnë mbledhje në zyrat e tyre të Kryesisë dhe sërish garda ka rethuar kryesinë e Kuvendit.
Kuvendi me një shkresë drejtuar gardës, ka njoftuar se deputetët e opozitës të cilët janë përjashtuar nga komisioni i Etikës, nuk do të lejohen që të futen në Kryesi, deri sa të përfundojë afati i përjashtimit.
Kujtojmë se deputetët Ervin Salianji, Gazmend Bardhi, Bledion Nallbati, Flamur Noka, Edi Paloka, Albana Vokshi, Saimir Korreshi, Petrit Doda, Edmond Spaho dhe Lefter Gështenja janë përjashtuar nga seancat parlamentare pas incidenteve të njëpasnjëshme në sallën e Kuvendit.
