Detaje të reja janë zbuluar nga ngjarja e rëndë e ndodhur në Vlorë këtë të hënë, ku mbeti i vdekur 55-vjeçari, Armando Meshau. Mësohet se molla e sherrit mes këtij të fundit dhe personit tjetër që ka qenë i përfshirë në sherr sipas A2 CNN ka qenë një apartament.
Viktima, ka qenë në një kancelari për të printuar dokumente, kur ka nisur të konfliktohet me personin tjetër, që ka qenë në të njëjtat ambiente.
Debati ka degjeneruar deri në përdorimin e grushteve, ku shkaku mësohet se ka qenë një banesë.
Meshau ka debatuar me personin në fjalë, duke e ofenduar dhe duke i thënë që nuk ka për ta marrë apartamentin, duke përdorur fjalë banale.
Më pas sherri ka degraduar deri në dhunë fizike, ku autori e ka qëlluar dy herë me grusht në fytyrë 55-vjeçarin, i cili ra pa ndjenja në tokë, duke humbur jetën në vend.
