Një figurë kryesore e opozitës u qëllua me gurë gjatë fushatës të së dielës përpara zgjedhjeve të përgjithshme të Turqisë.
Ekrem Imamoglu, kryebashkiaku i Stambollit, po përpiqej si pjesë e fushatës për të rrëzuar Recep Tayyip Erdogan, presidentin turk, pas gati dy dekadash në pushtet.
Autoritetet lokale në Erzurum, një bastion i Erdoganit pranë kufirit me Gjeorgjinë dhe Armeninë, u përpoqën të bllokonin tubimin duke mbushur sheshin kryesor me autobusë të qytetit.
Menjëherë pas fillimit të tubimit, sulmues të panjohur filluan të gjuanin me gurë zotin Imamoglu. Xhamat e furgonit të tij u thyen dhe kryetari i bashkisë u fut brenda nga truprojat e tij.
Një video e filmuar nga brenda autobusit tregonte një burrë që gjuante me gurë ndërsa oficerët e policisë aty pranë nuk lëviznin.
Guvernatori lokal ka konfirmuar se shtatë persona janë plagosur nga incidentet e ndodhura.
Ngjarja ka pasuar një varg sulmesh verbale gjithnjë e më agresive kundër opozitës nga zoti Erdogan dhe aleatët e ti.
Pas sulmit ndaj zotit Imamoglu, mijëra mbështetës të tij u dyndën në një nga aeroportet e Stambollit për ta përshëndetur në kthimin e tij.
Pas incidentit të dielën, Imamoglu akuzoi shefin e policisë së Erzurumit se kishte lejuar që sulmi të vazhdonte.
Të hënën, ministri i drejtësisë i Turqisë dënoi sulmin dhe konfirmoi se më shumë se një duzinë persona janë arrestuar për dhunën.
Gjatë fundjavës, të dy kandidatët mbajtën mitingje rivale në pjesë të ndryshme të Stambollit, duke tërhequr disa qindra mijëra njerëz./Opinion.al
