Prokuroria e Përgjithshme, në bazë të materialit të referuar nga ana e Policisë së Shtetit, ka regjistruar procedimin penal nr.2/2016, për veprat penale: kundërshtimit të punonjësit që kryen një detyrë shtetësore apo një shërbim publik, si dhe organizimi dhe pjesëmarrja në grumbullime dhe manifestime të paligjshme, për ngjarjen e datës 28.03.2016, ndodhur në zonën e Liqenit Artificial, në Tiranë.
Ndërkohë, Prokuroria e Përgjithshme, në bazë të referimit të Policisë së Shtetit, po kryen hetime në ngarkim të deputetit Gent Strazimiri edhe për ekzistencën e dyshimeve për kryerjen e veprës penale të prodhimit dhe mbajtja pa leje e armëve luftarake dhe e municionit.
Emri i deputetit Strazimiri është shënuar në Regjistrin e Procedimeve Penale të Prokurorisë së Përgjithshme në bazë të akteve paraprake të dorëzuara nga ana e Policisë Gjyqësore.
Ndër të tjera, në këtë material është edhe deklarimi i shtetasit Pellumn Nili, i paraqitur si ish-përfaqësues i një firme prodhimi armësh në Gjermani.
Sipas deklarimit të tij, kompania që përfaqësonte, i ka dhuruar disa vite më parë një sasi armësh Ministrisë së Brendshme, një prej të cilave pretendon se është në posedim të deputetit Gent Strazimiri dhe ekspozuar prej tij në ngjarjen e datës 28.03.2016, në zonën e Liqenit Artificial, Tiranë.
Ndërkohë, Prokuroria po vijon hetimet për persona të tjerë të përfshirë në ngjarjen e datës 28.03.2016, ashtu edhe për ligjshmërinë e projektit të ndërtimit të këndit të lojërave në zonën e Liqenit Artificial, në bazë të kallëzimit të dorëzuar nga përfaqësues të Shoqërisë Civile. /tvklan.al
