Presidenti i Republikës Bujar Nishani përmes një interviste në Klan tha se Qeveria ka miratuar një ligj që bie ndesh me parimet ndërkombëtare. Bëhet fjalë për ligjin e ri të pronave. Ndërsa për Ylli Manjanin, ai tha se ky ministër po i bën presion të hapur Gjykatës Kushtetuese, pasi është shprehur se “kjo gjykatë s’mund të pezullojë ligjin e pronave”.
Pjesë nga intervisa e Nishanit
“Nuk ka asnjë diskutim dhe argument që e hedh poshtë faktin se ky është një presion i hapur jo vetëm politik, por në këtë rast është edhe një presion publik, përderisa kuraja e presionit ndaj Gjykatës Kushtetuese, e cila deri më tash ishte konsideruar si një gjykatë që kishte ruajtur një standard pavarësie dhe integriteti, e cila aktualisht po refuzon të marrë një vendim për pezullimin e këtij ligji që përcjell përveç të tjerash, edhe frymën antievropiane të atyre që e kanë prodhuar dhe paraqitur këtë ligj, tregon që kapja politike e Gjykatës po kthehet në një shqetësim serioz dhe mbërritja deri te kapja politike e Gjykatës Kushtetuese komprometon shumë rëndë procesin e reformës në Drejtësi. E minon realisht procesin e reformës në Drejtësi. E bën tërësisht të pabesueshëm çdo angazhim dhe çdo deklamim për të reformuar sistemin e Drejtësisë”.
