Kreu i shtetit Bujar Nishani ka kërkuar hetimin e plotë dhe të pavarur nga ana e prokurorisë për pajisjen e përgjimit që sipas tij disponon Policia e Shtetit.
Ai tha se kushdo që pengon këtë hetim do të përballet me ligjin.
Duke besuar se kjo pajisje përgjimi ekziston në vendin tonë dhe ka hyrë ilegalisht pa lejen e Prokurorisë, Presidenti i Republikës foli për cënim të sigurisë kombëtare dhe të jetës së qytetarëve e zyrtarëve që mund të kenë rënë pre e përgjimit përmes kësaj pajisje.
“Nuk e besoja në fakt kur e pashë në media para disa ditësh. Tashmë i konfirmuar që ky mekanizëm ilegal qenka prezent dhe funksionon. Ky përbën shqetësim të madh për gjithë shoqërinë tonë. Nga kjo sallë i kërkoj zyrtarisht Prokurorisë që të mbrojë dinjitetin e shtetit dhe qytetarëve të tij. Të hetohet gjithë procesi i sjelljes në Shqipëri të kësaj pajisje, kush ka qenë ai autoritet doganor që ka lejuar të vijë në Shqipëri pajisjen, që në çdo rast duhet të hyjë më lejen e prokurorisë. I kërkoj prokurorisë të hetojë deri në fund, të hetojë zyrtarët që kanë përdorur këtë pajisje të paligjshme. Pajisja ka cënuar sigurinë kombëtare të Shqipërisë. Ka kërcënuar integritetin e të gjitha institucioneve, çdo qytetari të thjeshtë. Një pajisje e tillë s’mund të vijë në Shqipëri dhe të vihet në dispozicion pa leje nga prokuroria. I bëj thirrje institucioneve që pengojnë hetimet, të mos bëhen pengesë e funksionimit të ligjit në Shqipëri, çdo akt që pengon hetimin do të përballet me ligjin”, tha Nishani.
Kreu i shtetit ishte i ftuar në një ceremoni për 25-vjetorin e ish-të përndjekurve politikë të regjimit komunist, ku shprehu mbështetjen e tij ndaj kësaj kategorie të shoqërisë shqiptare.
