Materialet zgjedhore janë shpërndarë në të gjithë vendin gjatë mbrëmjes së të shtunës. Orët e para të së dielës, gjatë natë, nuk ka pasur incidente në asnjë vend, ndërsa Shqipëria voton për zgjedhjet vendoret.
Këto janë zgjedhjet më të çuditshme që ka zhvilluar ndonjëherë vendi, zgjedhje në të cilat nuk marrin pjesë partitë kryesore të opozitës dhe aleatët e tyre.
Kutitë e votimit janë hapur në orën 7:00 dhe do të mbyllën në orën 19:00.
30 qershori është shoqëruar me debate dhe përplasje të ashpra mes palëve, qeverisë, opozitës, Presidentit, por edhe ndërkombëtarëve, që kanë mbajtur qëndrime të forta dhe kanë mbështetur që zgjedhjet te zhvillohen sot, pavarësisht se Kreu i Shtetit ka dekretuar një ditë tjetër, 13 tetorin për zgjedhjet lokale në konsultime vetëm me partitë e opozitës, pasi Kryeministri Rama nuk i shkoi në takim.
Shkodër, qendrat e votimit zhvendosen në zyra pune dhe ambiente private
Janë pesë qendrat e votimit në Shkodër që janë zhvendosur, për zgjedhjet vendore. Tre që ishin parashikuar në shkollën 9-vjeçare ‘Ndre Mjeda’ janë spostuar te godina e zyrës së punës. Përkatësisht qendrat e votimit 291, 292 dhe 293 nga shkolla, materialet janë dërguar në ambientet e zyrës së punës.
Spostohen gjithashtu edhe 2 qendra tjera të cilat ishin të pozicionuara në godinën e ujësjellësit, dhe kalojnë në godinën e postës. Edhe në Bushat, KZAZ-ja e Vaut të Dejës që u dogj nga disa protestues u spostua në një subjekt privat, që sipas informacioneve shërben si lokal dasmash.
Ndërkohë, shkollat 9-vjeçare “Pashko Vasa” dhe “Ali Laçej” janë hapur me forcë, teksa zinxhirët janë këputur me darë./ Opinion.al
