TIRANE- Është firmosur sot marrëveshja mes Bashkisë së Tiranës dhe Fondit Amerikan të Zhvillimit për financimin dhe nisjen nga puna për rikonstruksionin e Pazaritit të Ri në Tiranë. I vendosur në qendër të kryeqytetit ai ishte lënë në mëshirë të fatit prej disa vitesh, duke u bërë një nga vendet më të ndotura.
Kryebashkiaku Erjon Veliaj ka premtuar se shumë shpejt Pazari i Ri do të jetë një nga destinacionet turistike më të bukura në Tiranë. Është menduar të ketë qendra biznesi, nënkalim, parking dhe një zonë pedonale.
“Pasi ky projekt të mbarojë, disa do vazhdojnë të shesin fiq, disa do të vazhdojnë të shesin mend, por rëndësi ka që të gjithë të kemi një ekonomi ku shesim, blejmë, marrim dhe japim me njeri-tjetrin, për një qytet që nuk ka kohë për të humbur, por që duhet të ecë shumë shpejt edhe falë këtij projekti”, u shpreh Veliaj me ironi për ata që e kanë përqeshur me deklaratat e fushatës se kur i vogël ka shitur fiq.
Ndërsa kryetari i Bordit të Fondit Amerikan të Zhvillimit në Shqipërisë, Michael Granoff, theksoi rëndësinë e investimit në këtë pazar. “Tirana është qyteti më i madh i Shqipërisë dhe kjo do të jetë zona e zhvillimit të biznesit më e madhe që kemi patur të bëjmë deri tani. Për këtë arsye fondacioni ka angazhuar 3 milion dollarë për këtë projekt”, sqaroi Granoff.
Ky projekt do të realizohet me bashkëfinancim. Tre milionë Dollarë, Fondi Amerikan për Zhvillim dhe 1 milionë Dollarë Bashkia e Tiranës.
Ne foto: Veliaj- Granoff gjate prezantimit te projektit
