TIRANE- Ka pak minuta që në selinë e PD po zhvillohet mbledhja e grupit me praninë e ambasadorëve Lu dhe Vlahutin. Dy ambasadorët, përkatësisht i SHBA dhe BE u shfaqën të dy bashkë në të njëjtën kohë (ora 10:00) në selinë e demokratëve.
Ndërkohë, Kryetari Basha dhe deputetët kishin shkuar më herët. Siç raportojnë gazetarët e TV nga terreni, vetëm Jozefina Topalli ka shkuar me vonesë duke shkelur selinë e partisë pas ambasadorëve. Kujtojmë se Topalli është kundërshtare e fortë e kësaj lloj mbledhje ku të huajt diktojnë politikanët tanë.
Lu dhe Vlahutin zhvilluan mbledhje dje edhe me grupin e PS dhe pas PD stacioni i radhës është LSI-ja. Ata po tentojnë të bindin partitë politike të miratojnë pa vonesa reformën në drejtësi. Dje teksa dilte nga selia e PS, ambasadori Lu tha se ” e di se është e pazakontë që ambasadorët të shkojnë në mbledhje grupi por e bëjmë këtë pasi reforma është në rrezik…”
