Me nisjen e aplikimit të çmimit të ri të energjisë elektrike nga Shkurti, zv/Kryeministrja Belinda Balluku teksa pa nga afër procesin e leximit të matësve të energjisë, tha se janë ndërmarrë të gjitha masat që të jetë sa më i drejtë.
“E gjithë procedura është e dizenjuar nga fillimi deri në fund që të jetë transparente. Bazuar në një urdhër të administratorit të përgjithshëm të kompanisë, të OSHEE-së, matja duhet bërë brenda 8 ditëve dhe matja është nga 30 ditë në 30 ditë. Pra nuk do të kalojnë 30 ditëshi, duke e bërë kështu të pakontestueshme mënyrën e matjes dhe saktësinë e saj”.
Afro 1 milion abonentë familjarë përfitojnë nga ulja e çmimit të energjsië në 8.5 Lekë për konsumin nga 0 deri në 700 kilovat/orë. Balluku, thekson se kursimi i energjisë mbetet një faktor i rëndësishëm në të gjithë këtë proces.
“Arsyeja pse ne vendosëm që të aplikonim një çmim më të ulët sipas kategorive të konsumit, 8.5 lekë për konsumin nga 0 deri në 700 kilovat/orë është sepse kërkojmë që të sensibilizojmë të gjithë popullatën, të gjithë familjarët të cilët përfitojnë nga kjo paketë mbi 1 milionë abonentë, që energjia është një mall shumë i rëndësishëm, i cili edhe duhet kursyer. Patjetër përdorimi i tij është i domosdoshëm në jetën e përditshme, por kursimi është akoma më i rëndësishëm për shkak edhe të të gjitha kushteve që ne kemi, hidrocentraleve, varësisë nga moti”.
Në të gjithë vendin ka 870 punonjës me detyrën e lexuesit të matësit të energjisë, për të ndihmuar këtë process këtë vit u shtuan 120./ Tv Klan
