Kryetarja e Kuvendit, Lindita Nikolla, u takua sot me të Ngarkuarin me Punë të Ambasadës së SHBA-së, David Wisner.
Përmes një postimi në rrjete sociale, Nikolla njofton se gjatë takimit u diskutua mbi kontributin e Kuvendit në forcimin e partneritetit strategjik mes Shqipërisë dhe Shteteve të Bashkuara dhe thellimin e reformave.
Ajo tha se Kuvendi po punon për avancimin e reformës në drejtësi, luftën kundër korrupsionit dhe konsolidimin e institucioneve demokratike.
“Një takim i ngrohtë dhe i dobishëm me të Ngarkuarin me Punë të Ambasadës së SHBA-së z. David Wisner.
Diskutuam mbi kontributin e Kuvendit në forcimin e partneritetit strategjik mes SHBA dhe Shqipërisë dhe thellimin e reformave.
Kuvendi po punon për avancimin e reformës në drejtësi, luftën kundër korrupsionit dhe konsolidimin e institucioneve demokratike.
Z. Wisner vuri në dukje se dhe partnerët do të vijojnë të mbështesin në konsolidimin e demokracisë, fuqizimin e shtetit të së drejtës, luftën kundër korrupsionit, integrimin euro-atlantik si edhe vlerësojnë angazhimin e institucioneve shqiptare në përparimin e vendit.
Me z. Wisner diskutuam edhe për përpjekjet për rikthimin e veprimtarisë së Kuvendit në normalitet, për zhvillimin e debatit parlamentar gjatë seancave plenare, në mënyrë që publiku dhe qytetarët të njihen më mirë me përmbajtjen e legjislacionit që shqyrtohet e miratohet në Kuvend.
Mirëpres vlerësimin e të Ngarkuarit me Punë, z. Wisner, se parlamenti është shumë i rëndësishëm për dhe sistemin demokratik dhe është e dobishme që palët në Kuvend të angazhohen për t’u shërbyer qytetarëve dhe të ardhmes euro-atlantike të Shqipërisë”, shkruan Nikolla./Opinion.al
