Për shkencëtarët, ndryshimi i klimës mund të jetë një ndër faktorët, pasi fshati zviceran Blatten u rrafshua pjesërisht pas rënies së një akullnaje të madhe.
Dr. Mylene Jacquemart ka bërë të ditur se gjatë dy javëve të fundit, është vërejtur paqëndrueshmëri e madhe tek shkëmbinjtë.
“Gjatë dy javëve të fundit, mbi akullnajë u zhvillua një paqëndrueshmëri e madhe e shkëmbinjve. Pra, kur ato filluan të binin nga mali dhe të depozitoheshin mbi akullnajë. Kështu që filloi të rrjedhë më shpejt drejt luginës. Dhe në fund të fundit, ajo që ndodhi dje, ndërsa nuk e dimë saktësisht se cili ishte zinxhiri i ngjarjeve”, tha Mylene Jacquemart, specialiste dhe gjeografë.
300 banorët e këtij fshati ishin evakuuar më herët në Maj, pasi një pjesë e akullnajës Birch filloi të shkërmoqej. Përmbytjet kanë rritur shanset për më shumë evakuime.
Autoritetet lokale u bënë thirrje banorëve në Gampel dhe Steg, fshatra disa kilometra më tej përgjatë Luginës së Lonzës, të përgatiten për evakuim të mundshëm në rast emergjence. Ushtria është në gatishmëri për të ofruar ndihmë kur kushtet e lejojnë.
“Në dimër, është gjithmonë shumë ftohtë dhe bie borë. Dhe kur bie shi, ai shkrin borën. Dhe këtu, në luginën tonë, temperatura është gjithmonë mbi 10-12 gradë Celsius dhe kjo sigurisht bën që akulli të shkrihet menjëherë dhe mund të sjellë në disa raste edhe këtë gjë siç ndodhi në këtë fshat”, tha një banor, Otto Jaggy.
Ekipet e shpëtimit ende vijojnë kërkimin për të gjetur një burrë 64-vjeçar i cili rezulton i zhdukur që nga rrëshqitja e dheut. Ndërsa ushtria zvicerane po monitoron nga afër situatën, disa ekspertë paralajmërojnë për rreziqet e përmbytjeve, pasi grumbuj të mëdhenj mbeturinash me gjatësi pothuajse dy kilometra po bllokojnë rrugën e lumit Lonza, duke shkaktuar fryrjen e tij.
Incidenti ka ringjallur shqetësimin në lidhje me ndikimin e temperaturave në rritje në ngricat e përhershme alpine, të cilat kanë zhavorr dhe gurë të ngrirë prej kohësh, duke krijuar rreziqe të reja. Klan News
