Këshilli i Lartë i Prokurorisë është mbledhur ditën e sotme për të vendosur mbi shpërndarjen e prokurorëve të Prokurorisë së Krimeve të Rënda në shkallën e parë dhe atë të apelit.
Kjo lëvizje vjen pasi më datë 19 dhjetor nis punën Prokuroria e Posaçme e SPAK dhe si rrjedhojë pushon së funksionuari Prokuroria e Krimeve të Rënda.
KLP vendosi që prokurorët Arens Çela, Blerim Tominaj, Besim Hajdarmataj, Doloreza Musabelliu, Elisabeta Imeraj, Manjola Kajana, Vladimir Mara, Sonila Muhametaj dhe Pranvera Pustina të transferohen në Prokurorinë e Shkallës së Parë Tiranë.
Prokurori Artan Bajrami transferohet në Prokurorinë e Apelit Tiranë, Përparim Kulluri transferohet në Prokurorinë e Shkallës së Parë Shkodër dhe Eugen Beci transferohet në Prokurorinë e Shkallës së Parë Korçë.
Beci dhe Kulluri janë shkarkuar nga vetting-u, por nuk ka marrë vendim forme të prerë, ndaj është proceduar me transferimin e tyre.
Ndërkohë pritet që shefja e Krimeve të Rënda Donika Prela të rikthehet në Durrës, ndërsa ish-kryeprokurorja Arta Marku të caktohet e përkohshme në Prokurorinë pranë Gjykatës së Apelit Tiranë pas largimit nga Prokuroria e Përgjithshme. /Opinion.al
