Prokuroria e Posacme e SPAK do të ngrihet në 19 dhjetor.
Sipas ligjit prokurorët e marrin detyrën pasi ata të jenë betuar te Presidenti i Republikës. Zëdhënësi i presidencës, Tedi Blushi ka bërë të ditur se në datën 19 dhjetor 2019, ora 09:30, organizohet ceremonia e betimit të 8 prokurorëve të emëruar në Prokurorinë e Posaçme (SPAK).
“Presidenti i Republikës, Sh. T. Z. Ilir Meta, në përgjigje të kërkesës së Këshillit të Lartë të Prokurorisë dhe në bashkëpunim me Kryetarin e KLP-së, z.Gent Ibrahimi, në mbështetje të nenit 61 pika 2 të ligjit nr. 96/2016 “Për statusin e gjyqtarëve dhe prokurorëve në Republikën e Shqipërisë” të ndryshuar”, ditën e enjte, në datën 19 dhjetor 2019, ora 09:30, organizon ceremoninë e betimit të 8 (tetë) prokurorëve të emëruar në Prokurorinë e Posaçme (SPAK).”
Tetë prokurorët e miratuar nga KLP për tu bërë pjesë e SPAK janë: Altin Dumani, Arben Kraja, Behar Dibra, Edvin Kondilli, Elida Celami(Kaçkini), Ened Nakuçi, Enkeleda Millonai, Klodian Braho.
KLP njoftoi gjithashtu tre ditë më parë se tre prokurorë kanë treguar interes për të drejtuar SPAK, Arben Kraja, Edvin Kondili dhe Altin Dumani.
Me ngritjen e SPAK do të shkrihet Gjykata e Krimeve të Rënda, prokurorët e së cilës do të shpërndahen nëpër prokuroritë e shkallës së parë dhe të Apelit të rretheve. /Opinion.al
