Teksa të gjithë prisnin formimin e Gjykatës Kushtetuese në këtë fund shtatori, duket se procedura rikthehet në pikën zero. Presidenca njofton këtë të premte se KED i ka sjellë vetëm dy kandidatë pas garës së hapur, ndërkohë që ligji kërkon të paktën 3 kandidatë për të vendosur më pas për zgjedhjen nga kreu i shtetit.
Ka qenë vetë Këshilli i Emërimeve në Drejtësi që i ka kërkuar kreut të shtetit rihapjen e garës pas “përfundimit përpara kohe të mandatit të ish-gjyqtarit, zotit Besnik Imeraj”.
Presidenca njofton se “Këshilli i Emërimeve në Drejtësi (KED) në përfundim të procedurave të verifikimit të kandidaturave të paraqitura për plotësimin e vendit vakant gjyqtar në Gjykatën Kushtetuese “Vakancë e parakohshme”, e krijuar nga përfundimi përpara kohe i mandatit, të ish-gjyqtarit zotit Besnik Imeraj dhe e shpallur për aplikim nga Presidenti i Republikës me Dekretin nr.10723, datë 07.02.2018, ka evidentuar se nga 15 (pesëmbëdhjetë) kandidatë që kanë shprehur interesin për konkurim, kanë ngelur në garë vetëm dy kandidatë të lejuar për kandidim dhe, konkretisht, zoti Besnik Muçi dhe zonja Regleta Panajoti”.
Çdo individ i interesuar për tu bërë pjesë e Gjykatës Kushtetuese ka afat për të paraqitur kërkesën sëbashku me dokumentacionin deri në datën 18 tetor 2019.
Për kriteret dhe kushtet e emërimit të gjyqtarit të Gjykatës Kushtetuese klikoni KËTU.
Institucioni më i lartë gjyqësor në vend, që bën interpretimin përfundimtar të Kushtetutës dhe zgjidh mosmarrëveshjet kushtetuese, ka pushuar së funksionuari që në mars 2018.
Sipas ligjit, Presidenti duhet të zgjedhë anëtarin në një nga tre emrat e parë të listës. Ndërsa për Kuvendi e zgjedh anëtarin e tij me 3/5 e votave. Nëse bëjnë zgjedhje brenda një afati 30 ditor, atëherë kandidati i parë në listë konsiderohet i emëruar. /Opinion.al
