Kryetarja e Bashkisë së Shkodrës, Voltana Ademi, ka folur përsëri për debatin që pati më 1 prill me drejtorin e Policisë së Shtetit, Ardi Veliu.
Ademi tha se në Shkodër po vriten dhe njerëz të pafajshëm, ndërsa ekzekutimi i dy vëllezërve Bilali mund të ishte parandaluar nga policia.
Sipas saj kanë qenë deklaratat e ministrit të Brendshëm Sandër Lleshaj dhe drejtorit të Policisë së Shtetit, Ardi Veliu që provokoi debatin.
Teksa i bëri thirrje Prokurorisë dhe Policisë që të bëjnë punën e tyre, kryetarja e Bashkisë së Shkodrës, tha se dhe ajo vetë është nën presion politik.
“Mendoj që ishte më e pakta që mund të thosha. Gjeta një moment dhe me qetësi dhe shumë korrektesë e përgjegjshmëri, sepse dikush duhet të flasë. Ishte e vlefshme që të paraqisja një shqetësim qytetar.
Ajo që më shqetësoi janë pikëpyetjet lidhur me përgjegjshmërinë mbi atë që ndodh, që nuk vihet re. Më ka vrarë shumë deklarata e ministrit, prandaj kam thënë se nuk mund ta lëmë situatën të precipitojë drejt larjes së hesapeve.
Nuk ka ndodhur që brenda gjashtë muajsh të kemi dhjetëra ndryshime drejtuesish pa shkak. Kjo që po them, në Shkodër e dinë të gjithë. Për këtë duhet të marrin hapat e veta, Policia, Prokuroria dhe Gjykata. Edhe unë vetë nga politika ndjehem e kërcënuar përditë, mjafton të shohësh deklaratat edhe të Kryeministrit. Pushteti vendor nuk funksionon si ishull më vete, por pjesë e administratës shtetërore”, u shpreh Ademi./ Opinion.al E.Xh.
