Një konflikt i nisur mes kamerierit të një prej lokaleve të njohura të zonës së ish-Bllokut, në Tiranë, dhe dy klientëve për një “pse më shikon me inat” ka përfunduar me dy të plagosur rëndë në janar të vitit 2015.
Autori i plagosjes ka qenë kamerieri i lokalit, 19-vjeçari Shkëlqim Imeraj, i cili është konfliktuar me klientët vetëm për shkak të vështrimeve të shkëmbyera me njërin prej tyre.
Të dëmtuar kanë qenë dy klientët, njëri prej të cilëve ka marrë një plagë në kraharor dhe tjetri në fytyrë. Ditët e fundit Gjykata e Tiranës ka përfunduar gjykimin ndaj tij, duke e deklaruar fajtor për akuzën e “plagosjes së rëndë me dashje”.
I riu u dënua me 3 vjet heqje lirie. Ai përfitoi uljen e një të tretës së dënimit, për shkak se u gjykua me procedurën e gjykimit të shkurtuar.
Burime zyrtare të Gjykatës bënë me dije se 19-vjeçari e ka ankimuar dënimin e tij në Gjykatën e Apelit. Referuar vendimit të Gjykatës, ngjarja është shënuar në 16 janar 2015.
Shtetasi Visuar D., së bashku me shokun e tij, shtetasin Gentian Gj., kanë shkuar për të pirë një kafe te lokali “C…”, që ndodhet në zonën e ish-Bllokut, në Tiranë.
“Në kafe e sipër shtetasi Visuar D. pretendon se një kamerier i quajtur Shkëlqim Imeraj i ka parë ata gjithë inat. Kur kanë dalë nga lokali, dy klientët, Visuar D. dhe Gentian Gj., janë konfliktuar me kamerierin Shkëlqim Imeraj, ku ky i fundit në konflikt e sipër është futur brenda në lokal. Ka marrë një thikë duke goditur Visuarin në krahun e djathtë.
Pas kësaj, Gentiani dhe Visuari kanë shkuar në Spitalin Ushtarak për të marrë mjekimin e specializuar, si dhe kanë bërë kallëzim në organin e akuzës”, thuhej në dosjen e Gjykatës.
Gjatë hetimeve i pandehuri Imeraj ka sqaruar se sherri kishte qenë i rastësishëm dhe se ai ishte i penduar për ngjarjen. Gjatë gjykimit, avokati i tij ka pretenduar se i pandehuri ishte sulmuar nga dy klientët e lokalit dhe se veprimet e tij kishin qenë vetëmbrojtëse.
