Pas lokalit, një biznesmeni i shpërthejnë tritol edhe në banesë.
Policia e Vlorës bën me dije se, gjatë orëve të para të mëngjesit të sotëm, persona të paidentifikuar i kanë vendosur lëndë eksplozive banesës shtetasit Robert. M., 57 vjeç.
Mësohet se ngjarja ka ndodhur në lagjen “Lirimi”, ku raportohet se sasia e eksplozivit i është vendosur derës së banesës të 57-vjeçarit.
Fatmirësisht nga shpërthimi i lëndës eksplozive nuk ka patur persona të lënduar, por vetëm dëme materiale.
Ndërkohë bëhet e ditur se objektit i është vendosur eksplozivë edhe para disa ditësh, ku janë regjistruar dëme të vogla material.
Blutë e Vlorës janë duke kryer hetimet në lidhje me zbardhjen e ngjarje dhe po punojnë për identifikimin dhe kapjen e autorëve.
Njoftimi i policisë:
Më datë 02.07.2017, rreth orës 03:25, në banesën e shtetasit R.M., 57 vjeç, banues në Vlorë, persona të paidentifikuar ende, i kanë vendosur lëndë eksplozive (plasëse) kësaj banese.
Ngjarja ka ndodhur në lagjen “Lirimi” pranë rrugës “Demokracia”, ku dyshohet se pranë derës së kësaj banese (kati II) është vendosur një sasi e vogël lëndë shpërthyese.
Si pasojë e shpërthimit, kemi vetëm dëmtime të pjesshme të derës së banesës.
Në momentin e ndodhjes së ngjarjes, nuk ka patur njeri në banesë.
Bëjmë me dije se këtij objekti (lokal-banesë) i është vendosur eksploziv edhe disa ditë më parë, me pasoja të lehta materiale.
Policia vijon veprimet hetimore në lidhje me zbardhjen e ngjarjes. Po punohet për identifikimin dhe kapjen e autorëve përgjegjës.
