Autoritetet kanë vijuar kërkimet edhe gjatë natës për të gjetur trupat e nënës dhe fëmijëve të saj, të cilët u vetmbytën në lumin Buna pas dhunës së ushtruar nga bashkëshorti. Deri më tani është gjetur vetëm trupi i vazjës 9-vjeçare, ndërsa kërkimet vijojnë për gjetjen e vajzës tjetër, djalit dhe nënës, Alma Arrazi.
Sipas informacioneve, konflikti në çift mësohet se kishte muaj që kishte nisur dhe çifti praktikisht ishte ndarë. Ergys Arrazi kishte nisur një marrëdhënie tjetër. Sipas familjarëve të gruas, Ergys Arrazi grindej çdo ditë me bashkëshorten e tij. Madje, ai i thoshte që të dalë nga banesa, ku ishte në një dhomë e jetonte së bashku me fëmijët.
I pyetur në polici ditën kur ka denoncuar zhdukjen e bashkëshortes, por edhe pas gjetjes të trupit të vajzës së vogël, ai kishte thënë për gruan e tij se është “e sëmurë mendore”. Ai kishte thënë se bashkëshortja kishte muaj që trajtohej me ilaçe depresioni.
Mirëpo dëshmia nuk është vërtetuar nga policia, pasi 39-vjeçarja nuk rezulton se ka kartelë apo të ketë mjek që të ketë lëshuar recetë për të për këto ilaçe.
Duket se gruaja ka qenë e vetme në një situatë, që duket aspak e lehtë. Kjo, pasi edhe pas zhdukjes së saj, e vetmja që ka treguar interes për të ka qenë motra, teksa vëllai dhe të afërmit e tjerë nuk janë interesuar në polici dhe nuk i janë përgjigjur kërkesës për t’u pyetur si persona që kanë dijeni për ngjarjen.
Një grua, nënë e tre fëmijëve në Shkodër, dyshohet se i ka dhënë fund jetës bashkë me të vegjlit të saj, pas dyshimeve se bashkëshorti e dhunonte.
