Të shtëna me armë zjarri janë regjistruar pak pas mesnate në fshatin Halilaj të Fushë Krujës. Persona, ende të paidentifikuar, kanë qëlluar në fasadën e jashtme të një lokali në pronësi të Mondi Vogës. Voga njihet për disa precedentë të mëparshëm penalë. Ai u arrestua në vitin 2020 nga Policia Rrugore në Tiranë pasi lëvizte me makinë të blinduar dhe me fenelina policie.
Ai u padit edhe nga avokati Ilia Ilia se ishte një nga personat që e dhunuan në Durrës, ngjarje e ndodhur në Durrës në vitin 2018, Ndër të tjera Voga, më herët ka qenë shoferi i ish-prokurorit Arjan Ndoja. Ndaj këtij të fundit është bërë atentat në vitin 2019, ngjarje ku mbeti i vdekur shoferi i Ndojës në ato kohë, Andi Maloku, ndërsa ish-prokurori dhe miku i tij Aleksandër Laho mbetën të plagosur.
Ndërsa në zgjedhjet e 11 majit, Ndoja kandidoi për Partinë Demokratike në Qarkun e Durrësit, duke fituar mandatin në Kuvendin e ardhshëm. /tvklan.al
