Enver Sinakolli, babai i Arditit, i cili ndërroi jetë gjatë breshërisë së armëve në lokalin ku ndodhej familja Çapja ka folur për gazetën “Panorama”.
“Ai ishte i shqetësuar për zhdukjen e djalit të vogël, Ambrit”, shkruan kjo gazetë, duke cituar më tej fjalët e Sinakollit.
“Pas ngjarjes, djali im është marrë nga Policia, edhe pse në momentin kur ka ndodhur shkëmbimi i zjarrit, Ambri ka qenë në banesë. Dua të di ku është djali im, nuk kam asnjë komunikim me të. Djali im është i pafajshëm. Policia ka nisur që mbrëmë të na shqetësojë. Këtu në shtëpinë time është bërë gardh me polici, dua të gjej djalin, nuk e di se ku më ndodhet. Është drita e syve të mi”, thotë Enver Sinakolli.
Madje, ai shpreh shqetësimet me Policinë, e cila, sipas tij, nga momenti në moment i kërcënon. “Shefi i Komisariatit të Policisë më ka kërcënuar duke më thënë se ‘do të të vras!’, dhe nuk e kuptoj arsyen se përse. Këtu është shtetrrethim, tamam si në luftë. Kam jetën time me familjen time, pse nuk më lënë të qetë?!”, u shpreh Sinakolli.
“Më vjen keq për mediat që shkruajnë gjëra të tilla për ne, kur nuk kanë asnjë informacion. I bëj thirrje Policisë që të më tregojë se ku e kam djalin, të kem mundësi të di se si është djali im, të cilin ma morën nga shtëpia pa bërë asgjë”, përfundon Enver Sinakolli, duke hedhur poshtë deklaratat e Policisë se mes saj dhe familjes Çapja ka pasur shkëmbim armësh mbrëmjen e së mërkurës (8 Qershor).
Lajme rreth të njëjtës ngjarje:
Lufta e Çapjave me Policinë, reagojnë të afërmit: Policia ushtron terror
Ja pse Çapjat qëlluan me armë zjarri mbi Policinë
Çapjat gjuajnë mbi policinë. Kapen dy persona, një në kërkim
