Burime nga policia kanë bërë të ditur se kanë vënë në pranga një të ri, në lidhje me krismat që u dëgjuan në orën 22:30 minuta në qytetin e Durrësit.
Dorian Hasa 30 vjeç, banues në Durrës, i dënuar më parë është vënë në pranga sepse
rreth orës 22:30, në lagjen numër 12, pas një konflikti për motive të dobëta, ka tentuar të vrasë me armë zjarri tip pistoletë 26-vjeçarin me inicialet R. P. banues në Durrës.
Ky i fundit e kishte goditur D. Hasën me grushte dhe me sende të forta në fytyrë. Hasa ka qëlluar me armë zjarri, në drejtim të shtetasit R. P. , i cili është shmangur duke u larguar me vrap nëpër rrugicat e lagjes.
Autori i dyshuar është larguar nga vendi i ngjarjes duke marrë me vete edhe armën e krimit. Me të marrë njoftim menjëherë ka shkuar në vendngjarje Policia e Durrësit.
Grupi hetimor këqyri vendin e ngjarjes, sekuestroi provat materiale, pyeti dëshmitarët okularë, të cilat mundësuan identifikimin dhe vënien në ndjekje të autorit të dyshuar.
Në vendngjarje u gjet dhe u sekuestrua një gëzhojë e kalibrit 7.62 mm, model 54.
Materialet i kaluan Prokurorisë së Rrethit Gjyqësor Durrës për veprime të mëtejshme për “Vrasja me paramendim e mbetur në tentativë” dhe “Prodhimi dhe mbajtja pa leje e armëve luftarake”.
