Almiri 4 vjeç kishte shkuar për një vizitë rutinë në spitalin e Kumanovës 4 ditë më parë por nuk doli i gjallë prej andej. Almiri nuk ishte sëmurë dhe nuk vdiq prej një fatkeqësie natyrore. Ai u shtyp mizorisht me makinë nga një person që ishte konfliktuar për shkaqe banale me babanë e Almirit.
Nga të dhënat paraprake të hetimit, që citohen nga mediat shqiptare, ngjarja ka qenë e tillë: Sedat Aliu me bashkëshorten dhe djalin 4 vjeç, Almirin kanë qenë duke pritur në radhë, në spitalin e Kumanovës. Mbërritja e një urgjence është bërë “mollë sherri”. Babai i Almirit ka lëshuar radhën, kjo ka bërë që të protestojë personi tjetër në radhë, shtetasi maqedonas, Boban Iliç.
Pas një sherri fillimisht verbal edhe më pas edhe fizik, familja shqiptare Aliu ka tentuar të largohet por Iliç me një akt të pashembullt barbar ka marrë makinën dhe ka shtypur 3 pjestarët e familjes shqiptare, ku plagët kanë qenë fatale për të voglin Almir, i cili ndërroi jetë në spital.
Mësohet se babai i autorit të vrasjes, Boban Iliç, është Goce Iliç një zyrtar i Ministrisë së Brendshme në Maqedoni. Fakti që bëhet fjalë për djalin e një inspektori të MPB, kjo e fundit nuk doli me raport zyrtar lidhur me rastin, shkruajnë gazetarët shqiptarë në Maqedoni.
Heshtja totale e mediave në gjuhën maqedonase duke mos i dhënë fare hapsirë ngjarjes vret edhe më shumë. Jo vetëm kaq.
Çfarë ndodh pas ngjarjes tragjike?
Ajo është komentuar gjerësisht si një ngjarje që në thelb ka urrejtjen ndëretnike. Mijëra qytetarë janë solidarizuar me familjen Aliu, shumë kanë qenë në varrim dhe shumë të tjerë kanë shprehur ngushëllime në distancë.
Në rrjetet sociale dhe më mediat shqiptare në Maqedoni, Kosovë e Shqipëri, vrasja e Almirit është Kryetemë. Shumë gazetatë i kërkojnë faktorit politik në Maqedoni, konkretisht Ali Ahmetit dhe Menduh Thaçit të mos heshtin. Nesër ka edhe një protestë popullore të organizuar nga shqiptarë në Maqedoni. Kjo nuk është herë e parë e vrasjeve me sfond etnik në Maqedoni ku viktima janë shqiptarët, por s’kishte ndodhur kurrë që viktimë të ishte një i mitur, 4 vjeç, krejt i pafajshëm.
/Opinion.al
