Emiljano Shullazi dhe dy miqtë e tij, Gilmando Dani e Blerim Shullazi nga Kruja u ndaluan me urdhër të Prokurorisë se Krimeve të Rënda, pasi dyshohen për një sërë veprash penale. Policia e Tiranës zbardhi akuzat ndaj tyre, për disa vepra të rënda penale.
Ata akuzohen për “shtrëngim për dhënie pasurie”, “shkatërrim të pronës me eksploziv”, “krijim dhe pjesëmarrje në grup të strukturuar kriminal”, “armëmbajtje pa leje dhe kanosje”.
Policia sqaroi se ndalimi i tyre është bërë për shkak se në bashkëpunim me njëri-tjetrin dhe me persona të tjerë në kohë dhe qytete të ndryshme, kanë shtrënguar nëpërmjet kanosjes për dhënien e pasurisë në mënyrë të padrejtë biznesmen të ndryshëm.
Sipas policisë, ata i kanë shkatërruar pronën me eksploziv të shtetasit me inicialet A.Z, me qëllim kanosjen e tij për fitimin e pasurisë në mënyrë të padrejtë. Televizioni Klan mësoi se bëhet fjalë për biznesmenin e ndërtimit Arjan Ziko. Këtij garazhi në pronësi të tij, pranë policisë bashkiake të Tiranës, iu vu një sasi tritoli me 13 mars të këtij viti. Shpërthimi, sipas Prokurorisë së Krimeve të Renda ka qenë vetëm paralajmërim.
Burime të grupit hetimor bënë të ditur për Televizionin Klan se, 38-vjecari Shullazi, bashkëmoshatari i tij Dani dhe 32-vjecari Shullazi po hetohen për 4 procedime që janë bërë në disa qytete.
Mësohet se Prokuroria e Krimeve të Rënda i kishte nën përgjim prej disa muajsh dhe mbrëmjen e shkuar ka kërkuar ndalimin e tyre. Tre te ndaluarit ndodhen në Drejtorinë e Policisë së Tiranës. Mbrëmë Shullazi është marre në pyetje dhe i ka mohuar akuzat.
Ai është pyetur edhe për kërcënimin e kandidatit për rektor në Universitetin e Tiranës, Mynir Konit, që u bë publik nga ish-kryeministri Berisha, por ka mohuar ta ketë kërcënuar atë. Ne pyetje është marre edhe akademiku Koni, i cili ka deklaruar para hetuesve se është kërcënuar, por nuk i ka njohur personat qe e kane kanosur.
Shullazi u ndalua rreth orës 21.15 në Tirane se bashku me Gilmando Danini dhe policia ushtroi kontroll edhe në banesën e tij. Ndërsa Blerim Shullazi, mik dhe i afërm i tij është ndaluar në Krujë.
Rreth dy orë më vonë, në Prokurorinë e Përgjithshme, kryeprokurori Ardiatik Llalla thirri në një takim urgjent Drejtorin e Përgjithshëm të Policisë së shtetit Haki Çakon, kreu i Prokurorisë së Tiranës, Petrit Fusha dhe kryeprokurorin e Krimeve të Rënda. Mësohet se në takim është folur për koordinimin e veprimeve në hetimet për tre te ndaluarit.
/TV KLAN
