Sot deputetët pritet të mblidhen në orën 11:00 në përpjekjen e 20 për konstituimin e Kuvendit të Kosovës.
Seanca dështoi në 11 përpjekjet e fundit te pika e njëjtë, propozimi i kryesuesit Avni Dehari, që nga votimi i hapur të kalohet në atë të fshehtë për zgjedhjen e kryeparlamentarit.
Të mërkurën, PDK-ja, LDK-ja, Lista Serbe dhe AAK-ja nuk propozuan anëtarë për komisionin për votim të fshehtë e as nuk morën pjesë në votim. Për pasojë mungoi kuorumi, e seanca u ndërpre dhe vazhdimi u caktua për sot.
Maxhoranca dhe opozita nga mandatet e shkuara që prej më shumë se një muaji nuk kanë arritur ta konstituojnë Kuvendin, e vazhdojnë ta hedhin përgjegjësinë tek njëri-tjetri për mosfunksionimin e institucioneve.
Partitë deri më tani në opozitë e kundërshtojnë votimin e fshehtë. Nga ana tjetër përfaqësues të LVV-së, edhe pse nuk i kanë numrat, kanë vazhduar të përsërisin se e drejta për propozimin e kandidatit për kryetar Kuvendi i takon vetëm partisë fituese.
