Partizani nuk ruan dot ritmin e fitoreve dhe detyrohet të lërë pikë të vlefshme në luftën për titull kampion. Skuadra e Starovës është ndalur ditën e sotme në një barazim të bardhë pa gola në Durrës ndaj Teutës vendase.
Ka qenë një ndeshje mjaft e luftuar nga të dyja skuadrat, të cilat kërkonin me patjetër fitoren për objektivat që kanë, por pa arritur ta marrin atë.
Partizani i pritshmërive të mëdha ishte nuk në ditën e tij më të mirë dhe për pasojë nuk arriti të kthehet me 3 pikë në “shtëpi” për të qëndruar në ndjekje të Kukësit. Ekipini drejtuar nga Starova nuk rrezikoi seriozish portën durrsake për të shënuar të paktën një gol për të marrë fitoren aq shumë të dëshiruar.
Megjithatë, nuk ishte asgjë e lehtë pasi edhe Teuta ishte futur në lojë me synime të qarta për të mos dalë pa pikë nga një ndeshje mjaft delikate. Pikë kjo që i shërben skuadrës së Maganit në luftën për mbijetesë.
Ekipi durrsak u fut mjaft i vendosur në fushën e lojës, madje i’u afrua edhe golit, por vetëm kaq. Në fund skuadrat ndanë nga një pikë dhe Partizani mbetet ne vendin e dytë me 39 pikë, ndërsa Teuta në vendin e 8 në renditje me 20 pikë.
