Instituti i Statistikave ka raportuar se rritja ekonomike për vitin 2018 ishte 4,06%, nga 4,3% që kishte parashikuar Ministria e Financave. Shkak për këtë ulje është bërë ritmi i ngadaltë i ekonomisë në tre mujorin e katër të vitit që lamë pas, ku ekonomia u rrit me vetëm 3,1%.
Energjia elektrike, që mbajti dhe peshën kryesore të rritjes gjatë muajve të mëparshëm, po zbeh gjithmonë e më tepër kontributin, ndërsa sektorët e tjerë shfaqen po ashtu në ngadalësim krahasuar me ritmin e ndjekur më herët.
Kjo do të bëjë që qeveria ta rishikojë me ulje parashikimin për një rritje prej 4,5% që ka bërë për vitin 2019. Institucionet ndërkombëtare si Fondi Monetar Ndërkombëtar apo Banka Botërore kanë parashikuar një rritje ekonomike goxha më të ulët, 3,6% dhe 3,7%.
Në fushatën elektorale të vitit 2017, premtimi kryesor i Partisë Socialiste për sa i përket ekonomisë, ishte rritja vjetore me 5% e Prodhimit të Brendshëm Bruto./Opinion.al
