Brenda qeverisë nuk ka një qëndrim të përbashkët sa i përket përgjimeve të publikuara nga gazeta gjermane Bild. Numri dy i PS-së, Taulant Balla gjatë një interviste për mediat gjermane tha se ky është një aksion i opozitës për të prishur imazhin e Shqipërisë.
“Për fat të keq, opozita shqiptare është munduar edhe në Gjermani, të hedhë baltë mbi Shqipërinë dhe mbi rrugën europiane të saj, por unë jam i bindur që këtu kjo baltë nuk ngjit për sa kohë që vlerësimi është teknik. Ky vlerësim ka të bëjë me realizimin e këtyre reformave; Reforma në Drejtësi, apo lufta kundër krimit dhe korrupsionit njihet si rezultat pozitiv dhe progres i dukshëm nga ana e Shqipërisë” tha Balla, i cili prej dy ditësh ka zhvilluar takime në Berlin.
Por edhe pse në të njëjtin delegacion ministri i brendshëm Sandër Lleshaj thotë se kto përgjime nuk prishin imazhin e Shqipërisë.
“Unë nuk besoj që një publikim i tillë prish imazhin e Shqipërisë. Sigurisht që asnjë lajm sado i vogël, që nuk është pozitiv, nuk na pëlqen. Por çështja ka nevojë që të merret me qetësinë e duhur pasi është në hetim dhe kjo është një rrjedhje e paautorizuar, duhet të presim fundin. Nuk duhet të kërcejmë te konkluzionet shumë herët, pasi i bëjmë dëm procesit. Ajo që është publikuar është pjesë e një dosje që po zhvillohet, bëhet fjalë për rastin konkret dhe përgjithësisht në të gjithë kuptimin e së drejtës përgjimet nuk janë prova, por incide që të çojë te provat. Duhet të presim deri kur të sqarohet rasti“, tha Lleshaj, ndërkohë që organi i akuzës e ka në dorë këtë dosje që nga 2016, dhe nuk ka lëvizur as “gishtin më të vogël”.
Përgjimet vënë në dukje lidhjet direkte që Astrit Avdylaj, kreu i grupit, mbante me kryetarin e Bashkisë së Durrësit Vangjush Dako, por dhe me kandidatin aktual të Partisë socialiste për Bashkinë e Shijakut Elton Arban, si dhe angazhimin e Avdylajt për të siguruar vota për Partinë socialiste dhe një prej kandidatëve të saj, deputetin aktual Ilir Ndraxhi./ Opinion.al
