Kryeministri Rama tha sot se në 24 orët e ardhshme po përgatitet një ofertë për ata që kanë punuar në të zezë në mënyrë që të marrin shpërblim gjatë kohës së karantinës.
Gjatë komunikimit live në Facebook, Rama i kërkoi personave që kanë punuar në të zezë se do të mund të përfitojnë vetëm nëse denoncojnë biznesin ku kanë punuar dhe në këtë rast sipas Ramës qeveria do të deryrojë biznesin të regjistrojë punonjësit.
“Për ata që punojnë në të zezë, është e pamundur të ndajmë kush ka punuar dhe kush jo. Kush ka punuar realisht në të zezë dhe është në vështirësi, ata duhet të kenë minimumi kurajon që të denoncojnë. Po bëjmë gati edhe shpërblim financiarë për ata që do të thonë kam punuar në të zezë në filan kompani dhe nuk kam asnjë të ardhur sot sepse nuk më ka regjistruar pronari. Pronarët kanë sanksione shumë të forta nëse mbajnë dikë në punë të zezë. Kjo nuk zgjidhet me kontrolle, nëse nuk ka nga brenda një zë kjo nuk zgjidhet.
Në shumë raste kemi bërë spostimi nga puna në të zezë në punë të ligjshme, falë presonit që kemi ushtruar nga kompanitë. Brenda 24 orëve do të kemi këtë ofertë për ata që kanë punuar në të zezë dh e sot janë pa mbështetje. Do tu japim një shpërblim financiar dhe do të marrim përsipër punën e tyre deri në fund, që pronarët t’i regjistrojnë dhe pronarët duhet të ndihmojnë me këtë, ose të përballen me ligjin“, u shpreh Rama.
Ai shtoi gjithashtu se qeveria po përgatit programin e hapjes graduale
Kryeministri theksoi se është duke u përgatitur një plan për këtë, ndërsa u shpreh se lokalet dhe restorantet do të jenë të fundit që do të hapen.
“Po përgatisim programin e hapjes graduale. Do të ketë rregulla strikte për hapjen e aktiviteteve tregtare apo ekonomike. Asnjë vend nuk ka folur për një hapje, ku restorantet apo lokalet janë në fillim apo në mes të procesit. Ata do të jenë të fundit që do të hapen. Është e pamundur ndryshe”, u shpreh kryeministri.
Kreu i qeverisë tha se beson që në fillim të muajit maj shumë nga 176 mijë personat që përfituan 40 mijë lekë të rinj nga paketa e dytë financiare, do të rikthehen në punë.
“Unë kam besim që nga fillimi i majit do të fillojë edhe kthimi në punë i shumë prej tyre, megjithatë nuk ka problem, nuk do bëjmë llogari të ngushta, por do bëjmë llogari të keni 400 mijë lekëshin dhe të merrni frymë dhe të mos keni problem të ekzistencën normale në familjen tuaj. Është mëse e mjaftueshme për të kaluar pa stres maksimal këtë fazë“, tha Rama. /Opinion.al
