Vrasja e Klodian Rashës pasi nuk iu bind urdhrit të efektivit të forcave “Shqiponja”, Nevaldo Hajdaraj, duket se ka ndezur protesta në të gjithë vendin.
Ditën e sotme protesta janë zhvilluar në Korçë, Berat, Lezhë, Kurbin të cilat janë shoqëruar shpesh me tensione, përplasje me forcat e policisë, dëmtimin e godinave dhe shkatërrimin e dekoreve të vendosura për periudhën e Krishtlindjeve.
Korça: Mësohet se protesta e cila ka nisur nga Komisariati i Policisë e deri në Bashkinë e Korçës zgjati rreth një orë dhe nuk ka qenë e qetë.
Raportohet se një polic ka mbetur i lënduar, kurse është dëmtuar gjithashtu edhe godina e Bashkisë Korçë. Protestuesit të cilët kanë gjuajtur me gur e sende të forta kanë thyer xhamat e bashkisë, teksa kanë djegur dhe pemën dekorative e zbukurimet e vendosura në qytet për Krishtlindjet.
“Policia vret”, “Qeveri e vrasjes”, “Poshtë komunizmi”, kanë qenë thirrjet e tyre, teksa në bulevardin kryesor kanë ndezur dhe qirinj në kujtim të Klodian Rashës.
Berati: Një grup të rinjsh marshuan nga pedonalja e qytetit në drejtim të drejtorisë së policisë me pankarta, qirinj dhe thirrje për drejtësi. Qytetarët kërkuan dorëheqjen e ministrit të Brendshëm Sandër Lleshaj nga detyra.
Kurbini: Një protestë homazh është mbajtur nga qytetarët e Kurbinit. Të cilët paqësisht kanë mbajtur pankarta në duar e qirinj të ndezur për viktimën Klodian Rasha.
Lezha: Të shumtë janë qytetarët që janë mbledhur pranë “Obeliskut” në Lezhë. Me dhjetra qytetarë kanë ndezur qirinj në nderim të Klodian Rashës. Me pankarta në duar me mbishkrime; “UnejamKlodi”, “Nëse je neutral në situata të padrejta, ke zgjedhur anën e tiranit”, ata bënë thirrje që të zbardhet ngjarja. Ndërkohë superstrada Lezhë-Shkodër është e bllokuar.
Ndërkohë që është paralajmëruar ditën e sotme një tjetër protestë në Tiranë. Pas të djeshmes e cila është shoqëruar me tensione e përplasje, kjo që pritet të zhvillohet është protesta e dytë në Tiranë për vrasjen e 25-vjeçarit Rasha.
Vlorë: Mbrëmjen e sotme një grup të rinjsh në janë mbledhur për të protestuar dhe kërkuar drejtësi për vrasjen e Klodian Rashës. Sipas raportimeve protesta ka qënë e qetë dhe pa tensione./Opinion.al
