Gjatë fjalës së tij kryeministri Rama ditën e sotme, në konferencën për shtyp me Presidentin e Turqisë Erdogan, ka “goditur” disa shtete, duke lënë të kuptojë se akuzat janë për vendet e Bashkimit Europian.
Rama është shprehur se Turqia e ka ndihmuar Shqipërinë edhe në kohë të vështira siç është pandemia, jo si disa shtete të tjera të cilat siç mbyllën njerëzit, mbyllën edhe vendin.
“Solidariteti i Turqisë mike dhe i presidentit Erdogan nuk është shprehur vetëm kur Turqia nuk ka pasur një problem të vetin, por edhe kur Turqia njësoj si ne u godit nga koronavirusi, presidenti dhe Republika e Turqisë i qëndruan pranë Shqipërisë dhe nuk vepruan si disa të tjerë, që njësoj sic u thanë njerëzve të mbyllen në shtëpi, mbyllën dhe shtetet e tjera dhe ndaluan deri edhe kalimin e ndihmave mjekësore për ata që kishin nevojë. Kjo ka qenë shumë domethënëse për ne, sic është domethënës edhe fakti që sot një nga temat e diskutimit ka qenë bashkëpunimi i afërt mes dy vendeve dhe mbështetja e Turqisë për Shqipërinë në gjithë procesin e kësaj lufte të madhe me këtë armik të padukshëm, pa u kursyer. Besoj që sjellja e Turqisë ndaj nesh dhe qasja e presidentit Erdogan në situatat kur vende si yni gjenden në vështirësi janë mishërimi i fjalës së paharrueshme të Qemal Ataturkut, që thoshte “njerëzimi është një trup i vetëm dhe cdo komb është pjesë e këtij organizmi”. Edhe pse Turqia u godit nga pandemia, kjo nuk e bëri të ndalet për asnjë sekondë projekti që po realizohet me mbështetjen e ministrit, mikut tonë Muratit. Solidarizimi ndaj ngjarjeve të tilla reflektojnë esencën e kësaj marrëdhënie dhe humanizmit, që është në themel të kësaj marrëdhënie. Jam krenar që sot m’u dha mundësia dhe nderi të nënshkruaj në emër të Shqipërisë deklaratën e bashkëpunimit të Këshillit të Nivelit të Lartë, me presidentin Erdogan”.- ka thënë Rama
Kujtojmë që prej disa ditësh kryeministri Rama e ka përmendur shpesh faktin që BE nuk ndihmoi apo edhe të dhuronte vaksinën kundë COVID-19 për vendet e Ballkanit Perëndimor.
Ndërkaq, në fund të bisedës Rama ka hedhur edhe një bast me Erdogan për investimet që pritet të bëj shteti turk në Shqipëri.
Rama: Jam i lumtur që së shpejti spitali rajonal i Fierit do të jetë realitet. Bastet në Turqi dhe në Shqipëri janë të ndaluara me ligj dhe nuk mund të vinim baste me Presidentin, por basti i Presidentit është që spitali i Fierit të jetë gati për tre muaj. Ky është një bast shumë i fortë
Erdogan: Dy muaj.
Rama: Unë do ta kisha humbur me dëshirë këtë bast. Por edhe shans për ta fituar do të kisha, pasi edhe turqit edhe shqiptarët kur vjen puna të zbatimi poshtë, duhet t’i shtysh vazhdimisht.
Erdogan: Rama, nuk duhet të ketë asnjë merak. Në Stamboll kemi ndërtuar dy spitale me nga 1008 dhoma, spitali i Fierit është vetëm një grimcë për ne, në 3 muaj./Opinion.al
