Vazhdon “lufta” mes Nejmar dhe Barcelonës. Klubi i është drejtuar gjyqit duke kërkuar dëmshpërblim financiar pas transferimit të sulmuesit brazilian te PSG-ja, duke e cilësuar atë si shkelës të kontratës së rinovuar mes palëve vetëm një vit më parë. Futbollisti i është kundërpërgjigjur duke i bërë “anti-reklamë” te Filip Kutinjo, një nga lojtarët që katalanasit kërkonin për ta zëvendësuar. Kutinjo dëshiron të transferohet në Spanjë, por deri tani, Liverpuli ka refuzuar ofertat e Barcelonës edhe pse ato kanë arritur shifrën 130 milionë euro.
Sipas gazetës braziliane “Estadao”, Nejmar ka folur me Kutinjon gjatë këtyre ditëve në grumbullimin e Kombëtares, duke e paralajmëruar që të mos pranojë ofertat e katalanasve. “Nejmar i ka thënë Kutinjos se nuk do të pendohet që Liverpuli refuzoi ofertat e Barcelonës”, shkruan gazeta braziliane për bashkëbisedimin mes dy lojtarëve, që shënon kapitullin e radhës së një lufte të ndezur./Panorama Sport
