Neymar ka rinovuar kontratën me Santos deri në fund të vitit 2025. Rikthimi i tij në klubin ku nisi gjithçka ka emocionuar tifozët, të cilët do të vazhdojnë të shohin idhullin e tyre me fanellën bardhezi pas aventurës në Arabinë Saudite dhe një periudhe të vështirë me dëmtime.
Për të shpallur rinovimin, sulmuesi brazilian foli në një konferencë shtypi, ku ishin të pranishëm vetëm miqtë dhe familja. Në një atmosferë të përzemërt, Neymar foli hapur për ndjesitë e tij dhe për rrugëtimin e deritanishëm.
“E di që jam një njeri i mirë, edhe pse është e vështirë të përballesh me ata që gjykojnë pa njohur realisht. Ndonjëherë më dhemb të lexoj gjëra të caktuara për mua, për miqtë dhe familjen time. Por kam mësuar ta pranoj”, u shpreh ai.
I lindur në vitin 1992, Neymar theksoi se është i përqendruar vetëm në të tashmen dhe në rikthimin në formën më të mirë të mundshme.
“Nuk më pëlqen të flas për të ardhmen. Dua të jetoj momentin. Objektivi im është të kthehem në 100% të formës sime dhe të jem i mirë në fushë, sepse e di që aty mund të bëj diferencën. Dua t’u sjell gëzim tifozëve të Santos dhe të jap gjithçka për këtë fanellë”, vijoi ai.
Rinovim me peshë ky për Santos, jo vetëm në aspektin sportiv, por edhe ekonomik.
