Gazeta “Dita” publikon sot një letër urimi të gruas së diktatorit Enver Hoxha për festat e fundvitit dhe një reagim të saj pas lajmit të rremë se Nexhmije Hoxha kishte ndërruar jetë.
Të shumtë ishin shqiptarët që vërshuan me komente në rrjetet sociale duke mos e fshehur kënaqësinë për vdekjen e së vesë së diktatorit. Por ajo duket se e ka marrë me sportivitet dhe shprehet se ka qeshur shumë me atë “marrëzinë e vdekjes” që doli në media.
Xhevdet Shehu shkruan në gazetën “Dita” se ka shkuar e ka marrë dorazi letrën e Nexhmijes tek shtëpia e saj në Laprakë, ku ka shkëmbyer edhe një bisedë më të.
Më poshtë biseda e tij me Nexhmijen, botuar sot në gazetën “Dita”
Sapo e lexova letrën që më dha, i thashë me shaka Nexhmije Hoxhës: Kjo letër duket si një përgjigje për ata që të “vdiqën” disa ditë më parë…
Mund të merret edhe ashtu, si një përgjigje për ata që sajuan atë lajm të rremë me shumë keqdashje dhe ligësi, – ma ktheu ajo. – Por unë nuk e them këtë në letrën e urimit që po u jap për Vitin e ri 2018. Unë u drejtohem veteranëve, miqve e dashamirësve dhe gjithë shqiptarëve.
Sidoqoftë, ai lajm ju tronditi ndopak, apo jo?
-Aspak. Madje u zbavita. Ju e kishit shkruar shumë mirë në gazetë përgënjeshtrimin. E përgënjeshtruan publikisht edhe Pranvera dhe Teuta. Unë u zbavita dhe kemi qeshur me atë marrëzi. Isha shtrirë dhe po pushoja si çdo ditë, kur më vjen Pranvera dhe më zgjon: “Po ngjallu, më tha, se të kanë vdekur para kohe…” Nuk e morëm vesh se kush e fabrikoi atë lajm, por pak rëndësi ka kjo, pasi janë ata që na sulmojnë prej më shumë se njëzet vjetësh… Por mendoj se në përhapjen e atij lajmi kanë përgjegjësi edhe gazetarët, ata që e shpërndanë nëpër portale, pa e verifikuar. Ku është profesionalizmi dhe etika profesionale në këtë rast?
Pa dashje biseda kaloi te polemika e ditëve të fundit mbi gjoja helmimin e Enver Hoxhës afro 33 vjet më parë që zuri faqet e para të gazetave.
Nexhmija: Është një debat i stisur dhe për të krijuar konfuzion. Kjo çështje është shumë e qartë dhe unë nuk merrem me to. Folën njerëz me integritet si Dr. Sabiti, Isufi e njerëz të tjerë. Unë i kam shkruar këto në librat e mija dhe nuk do rri e të merrem me shpifje. Ua kam dhënë përgjigjen njëherë e mirë në letrën që i kam drejtuar Ilirit e Teutës dhjetë vjet më parë, në 100-vjetorin e lindjes së Enverit. Është e kotë të merresh me shpifjet. Tani po vazhdoj të shkruaj kujtimet e mija…
