Kryeministri i Izraelit Benjamin Netanyahu do të paditet nga Prokuroria për tre raste korrupsioni dhe mashtrimi. Lajmin e bën të ditur televizioni izraelit, i cili thotë se ky do të jetë vendimi i Prokurorit të Përgjithshëm Avichai Mandelblit. Gjithsesi, seanca ku do të vendoset padia do të zhvillohet pas zgjedhjeve të 9 prillit, për të mos ndikuar në rezultatin e tyre.
Prej muajsh Netanyahu mbrohet duke thënë se është i pafajshëm dhe ka nisur një fushatë delegjitimimi fillimisht kundër policisë dhe prokurorisë, e më pas ndaj shtypit dhe mediave të tjera që merren me çështjet e tij gjyqësore.
Por duket se publikimi i lajmit nga mediat izraelite dhe ato ndërkombëtare, do të ndikojë jo pak në pozitat e kryeministrit Netanyahu, i cili qeveris vendin prej vitit 2009. Për herë të parë gjatë këtyre viteve, sondazhet tregojnë se do të shkohet deri në votën e fundit për të përcaktuar fituesin e zgjedhjeve.
Dy sfidantët e kryeministrit izraelit në zgjedhjet e 9 prillit, Benny Gantz, një ushtarak i respektuar dhe politikani i qendrës Yair Lapid, kanë deklaruar se do të hartojnë një listë të përbashkët dhe në rast fitoreje rolin e kryeministrit do t’ia kalojnë njëri-tjetrit me rotacion. Gantz është kryetari i partisë së re “Israel Resilience”, ndërsa Lapid drejton partinë “Yesh Atid” që aktualisht ka 11 vende nga 120 që ka në total parlamenti izraelit./Opinion.al
