Kryeministri i Izraelit Benjamin Netanyahu tha se çdo anëtar i Hamasit ishte “një njeri i vdekur” pas takimit të jashtëzakonshëm të qeverisë të vendit të tij.
Krahas tij, figura e opozitës Benny Gantz tha se ishte “një kohë për luftë”. Por presidenti amerikan Joe Biden tha se kishte folur me Netanyahun dhe i bëri të qartë se Izraeli duhet të “operojë sipas rregullave të luftës”.
Numri i të vdekurve në Izrael ka arritur në 1200. Më shumë se 1100 njerëz janë vrarë nga sulmet ajrore izraelite në Gaza. Zoti Biden tha se e kuptonte zemërimin dhe zhgënjimin e popullit izraelit, por i kërkoi Izraelit t’u përmbahej parimeve të konventave të Gjenevës. Ai gjithashtu paralajmëroi Iranin – i cili e ka mirëpritur sulmin e Hamasit – të jetë i kujdesshëm.
Më herët të mërkurën, Netanyahu dhe një nga kundërshtarët opozitarë Gantz ranë dakord të linin mënjanë një rivalitet të ashpër politik që ishte përshkallëzuar në protesta të gjera.
Gantz u tha qytetarëve izraelitë se qeveria e sapoformuar ishte “e bashkuar” dhe e gatshme për të “fshirë Hamasin nga faqja e dheut”.
Udhëheqësi kryesor i opozitës në vend, Yair Lapid, nuk i është bashkuar aleancës. Megjithatë, Netanyahu dhe Gantz thanë në një deklaratë të përbashkët se një vend do t’i rezervohej atij në kabinetin e luftës.
“Gjatë periudhës së luftës, nuk do të promovohet asnjë projektligj apo vendim i qeverisë që nuk ka të bëjë me zhvillimet e luftës. Të gjitha emërimet e larta do të zgjaten automatikisht gjatë periudhës së luftës”, thuhet në deklaratë.
