Gjatë një takimi me trupat ushtarake, pjesë e luftimeve në Gaza, kryeministri Netanjahu hodhi poshtë idenë e një armëpushimi dhe tha se në ditët në vijim ofensiva kundër Hamasit do të intensifikohet.
Komentet e Netanjahut vijnë disa ditë pasi Sekretari Amerikan i Shtetit tha se Izraeli duhet të ulë intensitetin e sulmeve të tij.
Ministria e Shëndetësisë në Gaza tha të hënën se rreth 20,674 palestinezë janë vrarë nga bombardimet izraelite që prej nisjes së luftës, pjesa më e madhe e të cilëve gra dhe fëmijë.
Më herët gjatë ditës, në një takim me anëtarët e partisë Likud, Netanjahu deklaroi se trupat ushtarake i kishin kërkuar që luftimet të vazhdojnë deri në asgjësimin e Hamasit.
“Të gjithë më kërkuan vetëm një gjë: të mos ndalemi dhe të vazhdojmë deri në fund. Pra, ne nuk ndalemi, vazhdojmë të luftojmë dhe thellojmë luftimet në ditët në vijim dhe do të jetë një luftë e gjatë dhe nuk është afër përfundimit”, u shpreh kryeministri.
Ndërkohë mediat izraelite dhe arabe thonë se Egjipti ka propozuar një plan armëpushimi mes dy palëve.
Sipas raporteve, plani parashikon lirimin me faza të të gjithë pengjeve izraelitë dhe një numri të papërcaktuar të të burgosurve palestinezë të mbajtur në burgjet izraelite gjatë një muaji e gjysmë, duke përfunduar me një pezullim të ofensivës së Izraelit.
