Nesër në orën 17:00 është parashikuar mbajtja e seancës së radhës parlamentare. Duke ardhur poas javës së gjelbër, në rendin e ditës së kësaj seanca parashikohet që deputetët të diskutojnë në Parlament problematikat që kanë konstatuar në terren në takimet me qytetarët.
Edhe pasditen e nesërme opozita ka parashikuar që të mos e ndalojë aksionin opozitar, siç ka bërë prej tre muajsh. Ndryshe nga herët e tjera, protesta pasditen e së hënës nuk do të jetë vetëm në parlament, por edhe jashtë tij.
Mësohet se nga parlamenti, protesta do të zhvendoset aty ku prej javësh është përqendruar aksioni i PD, poshtë banesës së ish kryeministrit Sali Berisha.
E teksa e hëna, pritet të mos prodhojë surpriza, seanca e ditës së enjte do të jetë edhe më e rëndësishme, pasi pritet të kalojnë një sërë projektligjesh, mes të cilëve më i rëndësishmi, ai që rikthen bastet sportive online, që nga opozita është kundërshtuar gjatë. Për këtë ligj, mazhoranca i ka votat, pasi duhet shumicë e thjeshtë, por të tjera nisma kanë mbetur peng në Kuvend për shkak se PS-së për t’i kaluar i duhen edhe votat e opozitës, siç janë pagat e Gjyqtarëve të Kushtetueses, amnistia penale apo zgjedhja e avokatit të popullit.
