Konferenca e Kryetareve vendosi që parlamenti të mblidhet nesër e premte, ora 17:00 për zgjedhjen e Presidentit. Nesër zhvillohet raundi i IV dhe i parafundit. Sipas kushtetutës në dy raundet e fundit presidenti zgjidhjet me shumicë të thjeshte 71 vota.
Tashmë janë djegur tre raundet e para pasi nuk u propozua asnjë kandidat për President.
Ndërsa mesditën e sotme Gramoz Ruçi nga salla e parlamentit i bëri një thirrje ultimative Ilir Metës duke i kërkuar që të votonin bashkarisht për Presidentin nesër në të kundër vendi duhet të shkojë në zgjedhje të parakohshme. Nga ana tjetër Ruçi i kujtoi Metës se ka skaduar çdo afat për negociata me opozitën dhe se duhet marrë një vendim i shpejtë. Po kështu Ruçi tha se PS i ka 71 vota për ta zgjedhur Presidentin edhe pa LSI por do të donte të ishin bashkë në këtë vemdimarrje.
Sakaq Opinion.al ka mësuar përmes burimeve se Ilir Meta po mbledh firmat për të garuar vetë për postin e Presidentit. Të shohim se çfarë do të ndodhë deri nesër në orën 17:00 kur Parlamenti mblidhet në raundin e katërt dhe të parafundit për zgjedhjen e Presidentit të ri.
/Opinion.al
